agosto 31st, 2010 riadoburgo
RECUPEREMOS A RÍA DO BURGO !!
Nova Galería de imaxes
agosto 30th, 2010 riadoburgoPodes ver unha galería coas imaxes das protestas, os verquidos e as actividades clicando neste enlace http://riadoburgo.blogaliza.org/galeria-de-imaxes/
O BNG esixe unha explicación sobre as afirmacións da Consellaría do Mar nas que acusou de “pasividade”á Confraría da Coruña na loita contra o furtivismo
agosto 24th, 2010 riadoburgoO deputado do BNG, Bieito Lobeira considera “un recital de demagoxia e ignorancia” o ofrecido polo Subdirector Xeral sobre a actuación da Confraría da Coruña na loita contra o furtivismo na Ría do Burgo
O portavoz de pesca do g.p do BNG, Bieito Lobeira vén de presentou unha iniciativa na Cámara galega sobre as acusacións de pasividade fronte o furtivismo realizadas pola Consellaría do Mar á Confraría de Pescadores da Coruña.
O deputado do BNG, cualifica de “escandaloso recital de demagoxia e ignorancia” as declaracións do Subdirector xeral e lembra que os vixilantes da confraría non son funcionarios públicos, non están autorizados a levantar actas nin posúen presunción de veracidade ante un furtivo ou infractor.
Lobeira considera “intolerables” as manifestacións do responsábel do Servizo de Gardacostas que mesmo deixou entrever que descoñecía o paradoiro dos cartos públicos destinados á vixilancia.
O parlamentario nacionalista quer saber se a Consellaría do Mar mantén as súas acusacións de “pasividade” da Confraría da Coruña para combater o furtivismo ou vai desautorizar o afirmado publicamente polo Subdirector Xeral do Servizo de Gardacostas de Galiza.
podes descargar a pregunta de Bieito Lobeira clicando aquí
Os Mariñeiros da Coruña realizan unha “peregrinación-protesta” desde A Coruña ate o Bierzo
agosto 23rd, 2010 riadoburgo
Un grupo de mariscadores da Confraría da Coruña iniciou o día 23 de agosto unha "peregrinación-protesta" en sentido inverso desde A Coruña a Vilafranca do Bierzo para reivindicar o saneamento integral da ría do Burgo.
Os mariñeiros, que farán a ruta en bicicleta, visitarán os 50 albergues repartidos polos 183 quilómetros do percorrido para mostrar ás peregrinas e peregrinos fotos das verteduras da ría e distribuír 25.000 pasquíns sobre a situación da zona. O feito de facer a ruta en sentido inverso permitirá atopar de fronte aos peregrinos facendo que a mensaxe se difunda moito máis.
Esta marcha forma parte das manifestacións simbólicas postas en marcha pola Confraría de Pescadores para denunciar a situación da ría do Burgo, despois de que a Xunta decidise reabrila ao marisqueo hai unhas semanas, tras modificar a súa clasificación de C -non apto para o consumo-, a zona B, que permite que o produto chegue ao mercado despois dun proceso de depuración.
Este cambio de clasificación foi rexeitado tanto polos mariscadores como pola Plataforma en Defensa da Ría do Burgo, que puxeron en dúbida o rigor destas analíticas e mesmo teñen denunciado a situación ante a Unión Europea.
Podes ver máis fotos da ruta clicando na galería de fotos
O BNG pide responsabilidades diante do Parlamento Europeo pola contaminación na Ría do Burgo.
agosto 13th, 2010 riadoburgoO BNG tratará que unha delegación da UE visite e comprobe o estado da ría. A cofraría de Pescadores e os mariscadores e mariscadores e os distintos colectivos que forman parte da Plataforma enviaron dúas denuncias ao Parlamento Europeo.
Nunha rolda de prensa, xunta a membros da Cofraría e das entidades que forman parte da Plataforma pola defensa da ría , Ana Miranda explicou que a intención do BNG é que membros do pósito coruñés se trasladen a Bruxelas para explicar personalmente a gravísima situación da Ría do Burgo. Na rolda de prensa tamén expresou o rexeitamente a reapertura da zona por parte da Xunta de Galiza sen que cesaran os verquidos. Expresou deste xeito o apoio do BNG aos mariscadores e mariscadores na súa negativa a saír a faenar.
Ana Miranda afirmou que a situación existe “por un problema de deixadez política” os verquidos persisten e os mariscadores e mariscadoras advertíron que a UE pode sancionar a Xunta de Galiza por incumprir as directivas europeas.
O BNG reclamou un estudio escrupuloso sobre a situación da ría e un saneamento integral da mesma. Ana Miranda amosou a súa confianza en que a comisión admita a trámite a denuncia e aclarou que só co apoio dos grupos parlamentares é suficiente para a apertura dunha investigación.
O BNG presenta 6 iniciativas ante o Parlamento Galego tras a apertura ao marisqueo da Ría
xullo 29th, 2010 riadoburgoO BNG, a través dos seus deputados Carlos Aymerich e Ana Luisa Bouza, participaron na concentración dos mariscadores da ría do Burgo en protesta pola reapertura da ría e deron tamén unha rolda de prensa para presentar diferentes inicitivas para debatir na Cámara a conveniencia da decisión da Xunta e abordar o problema do furtivismo.
Aymerich considerou que o único obxectivo da Xunta coa recalificación é aforrar cartos, "e unha mostra máis da austeridade de Feijóo", ironizou, e lamentou que para tomar esta decisións orientaran as analíticas "como mellor lle conviña á consellería".
Segundo o portavoz parlamentar nacionalista, nin a periodicidade das analíticas é mensual nin o lugar escollido é representativo do resto das augas e lamentou que un instituto do prestixio internacional do Intecmar estea sendo manipulado polo PP.
Para Aymerich e Bouza, se os resultados foran positivos dende hai tres anos como sostén a consellería, a ría non tería pechado en 2007, polo que están convencidos de que o verdadeiro obxectivo da Xunta é evitar as axudas dirixidas aos traballadores.
As iniciativas apresentadas son as seguintes (podes descargalas picando sobre cada unha delas):
A Plataforma denuncia ante o Parlamento Europeo o incumplimento por parte das administracións locais, autonomica e estatal, de 3 directivas europeas
xullo 27th, 2010 riadoburgoA Plataforma en defensa da Ría do Burgo vén de denunciar, ante a comisión de peticións do Parlamento Europeo os reiterados e históricos incumplimentos das Directivas europeas 79/923/CEE de 30 de outubro, sobre normas relativas á calidade das augas; 91/271/CEE , de 21 de maio relativa ao tratamento das aguas residuais urbanas; e 2006/113/CE de 12 de decembro relativa á calidade esixida ás augas para a cría de moluscos por parte das administracións locais, a Xunta de Galicia e o Goberno de España.
No seu escrito a Plataforma sinala que "A Ría do Burgo da Coruña caracterizouse sempre por ser unha boa zona para o baño, actividades deportivas náutico e terrestres... A situación de contaminación, derivada dun consentimento por parte dos gobernos locais e do propio goberno autonómico desde hai máis de 25 anos, non só afecta ao anteriormente citado senón que tamén afecta á calidade das augas de baño como os areais naturais das praias de Santa Cristina e as Xubias. Pondo en perigo a futura subsistencia e a economía dos hostaleiros e demais empresas da zona".
"A pesar das continuas denuncias por verteduras por parte desta plataforma e do coñecemento da grave situación desde moito tempo atrás, os responsables públicos permiten o grao de contaminación sen pór solución a este grave problema".
En canto ás verteduras urbanas sinalase que : " A Coruña, Oleiros, Cambre e Culleredo ... seguen verquendo as súas augas residuais directamente á Ría do Burgo sen depurar, en espera da posta en funcionamento da depuradora de Bens (anunciada para o 2010, que con todo agora xa se atrasa até o ano 2011, segundo as últimas previsións, data sen determinar)... A Coruña é a única de máis de 200.000 habitantes de todo o Estado que non conta con depuradora de augas residuais...". "Outras verteduras de orixe industrial favoreceron a degradación da zona: empresas como o matadoiro Fricosa, fábrica de Aceites Bunge, Frigoríficos Conchado, xabóns a Toja e fertilizantes CROS... verten directa e indiscriminadamente todos os seus residuos sen ningún tipo de tratamento, e carecendo de conexión á rede de sumidoiros das redes municipais tendo coñecemento disto tanto as autoridades locais como autonómicas".
No escrito a Plataforma tamén se queixa da lentitude da xustiza en resolver as denuncias presentadas por particulares e colectivos desde xuño de 2008 de verteduras á Ría, e que se viñeron repetindo sucesivamente sen que "...ate o día de hoxe non haxa ningunha sentenza na cal existan responsables das devanditas verteduras".
A Plataforma sinala como culpables da situación tanto á Administración central ou estatal (concretamente ao Ministerio de Medio Ambiente: con competencia en materia de dominio público marítimo-terrestre e redución da contaminación por verteduras ao medio mariño); á Xunta de Galicia (en concreto a Augas de Galicia, e ás Consellarías de Medio Ambiente e Mar por teren as competencias sobre a calidade das augas e as verteduras, saneamento de augas residuais e loita contra a contaminación do litoral respectivamente) e aos Concellos da Coruña, Oleiros, Cambre e Culleredo (con competencias en materia de medio ambiente, tratamento e vertedura de augas residuais, e control sobre as súas redes de saneamento).
A Plataforma indica que "o panorama de futuro para a Ría do Burgo resulta desalentador e escandaloso cando as verteduras séguense sucedendo de modo case continuo a pesar das continuas denuncias" e reclama do Parlamento Europeo as seguintes actuacións:
- que se tomen medidas urxentes para pór freo á contaminación.
- unha firme actuación na aplicación de sancións aos causantes directos e indirectos das verteduras á Ría.
- pór en marcha con carácter urxente un proxecto integral de saneamento e de rexeneración ambiental para eliminar os importantes focos de contaminación que aínda existen no Concello da Coruña, Cambre, Culleredo, Oleiros así como a retirada dos lodos dos fondos mariños que chega a alcanzar 1,90 metros de espesor facendo imposible a produción de bivalvos e xerando un perigo en caso de caída ao mar.
- a posta en funcionamento urxente da EDAR de Bens.
Clica aquí para descargar o escrito á comision_de_peticions_do parlamento_europeo
A Plataforma oponse a reapertura da Ría do Burgo ao marisqueo até que se completen todas as tarefas de rexeneración e recuperación
xullo 8th, 2010 riadoburgoO colectivo manterá unha xuntanza este venres para estudar as accións a desenvolver contra a decisión da Consellaría do Mar
A Plataforma para a defensa da Ría do Burgo, integrada por máis de 30 entidades, diante do anuncio da Xunta de Galiza de abrir parcialmente a ría ao marisqueo a partir de mediados de xullo, ten convocada unha xuntanza o vindeiro venres, 9 de xullo, para avaliar as actuacións a levar a cabo contra esta decisión.
Dende a Plataforma quérese manifestar a total oposición á apertura da Ría da Burgo, xa que dende a súa constitución en marzo de 2008 non se efectuou ningunha das reivindicacións do colectivo, manténdose as administracións estatais, galega e municipais nunha completa actitude de desprezo cara aos traballadores/as e a poboación afectada e ignorando o cumprimento das normativas vixentes.
Até hoxe continúan sen aplicarse as sancións correspondentes aos causantes directos e indirectos dos vertidos; está sen rematar o proxecto integral de saneamento para eliminar os focos de contaminación causados polas verteduras directas das redes de augas fecais dos concellos da comarca; a EDAR de Bens aínda non entrou en funcionamento; así como tampouco se consensuou un Plano de Rexeneración e limpeza da Ría nin un proxecto de Recuperación dos Bancos Marisqueiros.
Á vista da pasividade e falta de vontade para a limpeza e recuperación desta área, a Plataforma oponse á tentativa da Consellaría do Mar de abrir a parte exterior da ría para a actividade mariscadora, en base a criterios economicistas e sen ter en conta os perigos para a saúde, até que non consiga a eliminación total dos vertidos e o saneamento integral da ría. Así mesmo, a Plataforma demanda o mantemento dos convenios subscritos entre a Consellaría e a as agrupacións de marisqueo até ter garantías de recollida dun produto apto para o consumo.
A Plataforma reivindica un compromiso firme das administracións co colectivo de traballadores e traballadoras da Ría do Burgo de cara a posibilitar nun futuro próximo a reapertura da actividade mariscadora (cun produto de cualidade) e garantir así o mantemento dos empregos de 140 familias.
A Coruña, 8 de xullo de 2010
Marcha cidadá o domingo 8 de novembro para exixir o saneamento e a rexeneración inmediata da Ría do Burgo
novembro 6th, 2009 riadoburgoA mobilización partirá ás 12 do mediodía da “Casa das Palmeiras” e percorrerá o paseo marítimo de Fonteculler
A Plataforma para a defensa da Ría do Burgo, convoca unha marcha o vindeiro domingo, 8 novembro, para exixir ás administracións galega e estatal o inicio de actuacións para a recuperación, limpeza e rexeneración deste espazo. A marcha, na que se agarda unha importante participación, partirá ás 12 do mediodía da Casa das Palmeiras e percorrerá o Paseo Marítimo de Fonteculler para comprobar o estado de contaminación da ría e os principais puntos nos que se producen vertidos.
A Plataforma para a defensa da Ría do Burgo vai retomar as mobilizacións para exixir a recuperación inmediata deste espazo, logo de que nin nos orzamentos xerais do Estado nin nos da Xunta de Galiza aparezan recollidas partidas económicas destinadas a actuacións de saneamento e rexeneración da Ría.
A Plataforma anima a toda a cidadanía a participar na marcha que terá lugar o vindeiro domingo, 8 de novembro, ás 12 da mañá, a través da que se quere amosar o estado de degradación da Ría e concienciar á poboación da importancia de recuperar este espazo.
Con esta mobilización Plataforma quere reclamar unha actuación firme na aplicación de sancións aos causantes directos e indirectos dos vertidos á Ría do Burgo, así como a finalización do proxecto integral de saneamento para eliminar os focos de contaminación que aínda existen nos concellos de A Coruña, Cambre, Culleredo e Oleiros. Neste senso resulta inconcibíbel que un núcleo de poboación como A Coruña e a súa comarca continúe sen ter un sistema de tratamento de augas residuais e os concellos aínda vertan directamente ao mar.
Plano de Rexeneración ambiental
Dende a Plataforma reclámase tamén a concreción dun Plano de rexeneración ambiental para limpeza integral da Ría do Burgo, co obxecto de recuperar esta área tanto para o lecer cidadá como para a recuperación dos bancos de marisco. Queremos lembrar que as augas da Ría continúan a estar clasificadas como Zona C, polo que os traballadores/as do mar non poden extraer marisco. Pedimos unha actuación inmediata porque se está pondo en perigo a existencia dos bancos marisqueiros e as garantías económicas de 140 familias que viven desta actividade.
Desde a Plataforma lamentamonos de que a día de hoxe aínda non se teñan tomado medidas para erradicar os vertidos, especialmente nun momento de crise económica como o actual, xa que as propias actuacións sobre a ría xerarían postos de traballo e posibilitarían converter esta zona nun foco de traballo moi produtivo tendo en conta a capacidade e o potencial para a explotación dos recursos marisqueiros que posúe a Ría, se estivese recuperada. A Ría do Burgo está nun nivel moi marxinal de aproveitamento das capacidades marisqueiras, cuxos recursos se verían incrementados coa eliminación dos focos de contaminación.
Non obstante, mentres isto non aconteza, dende a Plataforma defendemos a vixencia temporal indefinida dos actuais convenios subscritos entre a Consellaría do Mar e as agrupacións de marisqueo da Ría do Burgo.
A Plataforma solicita reunirse co Conselleiro de Medio Ambiente e cos catro alcaldes dos concellos da Ría
novembro 27th, 2008 riadoburgoAo remate do acto de entrega das solicitudes, a delegación da Plataforma para a defensa da Ría do Burgo, concentrous diante do edificio Administrativo de Monelos.
Representantes da Plataforma para a Defensa da Ría do Burgo rexistraron o 27 de novembro un escrito no Edificio Administrativo de Monelos no que demandan entrevistarse co conselleiro de Medio Ambiente e cos alcaldes dos concellos da Coruña, Cambre, Culleredo e Oleiros.
Nestes escritos a a Plataforma indica que como resposta ás 17.000 sinaturas entregadas á Consellaría, esta, anunciou unha serie de actuacións en coordinación cos concellos afectados.
A dia de hoxe, máis alá da propaganda que fan as distintas administracións, non se comproban melloras na situación da Ría, ao contrario, a situación estase a agravar, como recentemente recoñeciu o Delegado Provincial da Consellaría na Coruña.
Do mesmo xeito descoñecense as dotacións orzamentarias destinadas pola Xunta e polos Concellos afectados para sanear a Ría, detectar, ou pór fin aos verquidos; ou se a Consellaría e os Concellos van realizar algunha acción coa partida orzamentaria de un millón de euros que se destinaron a estes fins nos Orzamentos Xerais do Estado.
ver o contido dos escritos en PDF
Contacto: